ЈЛБ „Илинден“ – Делчево одржа работен состанок со претседателот на Здружението на Македонците во Офенбург, “Македонска Зора-93 Офенбург”, Германија,Златко Митевски.
Средбата беше можност да разговараме за една прекрасна и значајна иницијатива – создавање простор во кој македонскиот јазик, културата, традицијата и љубовта кон книгата ќе бидат блиски до најмладите Македонци кои живеат надвор од татковината.
Со особена радост го поздравуваме фактот што Здружението доби дозвола за формирање паралелка во која децата ќе го изучуваат македонскиот јазик, како и за создавање македонско детско и информативно катче.
Како библиотека, со задоволство ќе се потрудиме да дадеме свој придонес во оваа убава мисија и, во рамките на нашите можности, да донираме книги и литература за децата.
Зашто книгата не познава граници.
Таа го чува јазикот, го буди споменот, ја негува припадноста и ги поврзува децата со нивните корени.
Нека во Офенбург растат нови генерации деца кои ќе читаат, ќе учат и со гордост ќе го зборуваат македонскиот јазик.
ЈЛБ „Илинден“ – Делчево
За книгата. За јазикот. За нашите деца. За Македонија.
